Pawng Jinghpaw sha ni kanang na pru ma ai kun?

Pawng  Jinghpaw sha ni kanang na pru ma ai kun? Kadai n chye tsun nga ai. Myen mung hte Miwa mung lapran e de nga ai amyu kaji ni gaw tinang a  lamu ga hpe up lu ai malawng maga gaw masum tsa ning grai n du ang ma ai. Jinghpaw, Azi,  Maru hte Lashi amyu ni yawng a npawt langai sha rai nga ai.  Shanhte gaw Mongoli nga ai amyu ni rai nga nna Miwa, Myen, Sam the Kayin amyu ni a kahpu kanau ni rai ma ai.Shanhte kanang na pru wa ma ai kun? Ngai chye mayu ti mung, Jinghpaw amyu ni moi kaw nna laili laika n lu ai majaw  ya shanhte hkai dan ai mau mwi gaw kam shara nnga ai.Ya shanhte tsun ai abung maumwi gaw, katik katawk hkrai ra nga nna malawng maga tak yu ai lam sha rai nga ma ai.Shanhte gawn ai ahtik labau hku hkan yang, Pawng Jinghpaw ni a dai daw buga gaw, Majoi Shingra Bum rai nga ai. Majoi Shingra Bum Mahtang  kanang rai nga ai kun? Kadai n chye tsun nga ai. Mungkan ga ting hproi chyam hkra hkan sawk  tam yu hkawm ai, byeng-ya lu ai masha ni gaw, dai amying mying ai bum hpe kanang mung n lu tam ma ai. Jinghpaw Jai wa Dumsa ni hpe san yu yang shanhte gaw”Htaw de” nga nna dingdung maga de madun ma ai. Rai timung htaw de kade tsan ai gaw kadai n chye tsun ai. Mungnun ga na, Singhpo (Jinghaw) ngu ai ni tinang a mung the ani sha  nga nna tut nawng e hkyen amgap nga ai Daihpa Bum hpe majoi Shingra Bum rai nga ai, nga nna tsun kajai shajang ma ai. Raitimung  dai gaw tak yu ai lam sha naw rai nga nna, sakse majing rai n rai lu nga ai.

Myitung Sut Nau,  Ja the Lungseng  Jubili Laika  1972, p.100-101